12 сар гараад 7 хоночихлоо. Ингэхэд Шинэ жилээ хэрхэн тэмдэглэх гэж байна? Ойрд дулаахан байж байж өнөөдөр жаахан хүйтэрсэн чинь сая л нэг юм шинэ жилийн уур амьсгал мэдрэгдэж эхлэв. Уул нь аль эрт л гудамжаар гэрлэн чимэглэл анивчиж , гацуур мод чимэглэн зассан байсан ч дулаахан болохоор нэг л хиймэл санагдаад байсан юм.
Ер нь Шинэ жилийн уур амьсгал хаанаас хаанаас бий болдог юм бэ? Цагаан цас ногоон мод, саа чимэгэлүүд л Шинэ жилийн үдшийг хамгийн онцгой болгодог гэж үү? Мөрөөдөл биелэх мөчийг хүлээж буй мэт биднийг эртнээс догдлон хүлээхэд хүргэдэг тэр хүч хаанаас гардаг юм бэ?
Бага байхад Өвлийн өвгөний бэлэг Шинэ жилийг давтагдашгүй баяр болгодог байсан. Харин шидэт үлгэрт итгэхээ байн ,Өвлийн өвгөн байдаггүйг ойлгосон томчуудын хувьд гүйлгээгээ ихэсгэчих санаатай дэлгүүрүүдийн сурталчилгаанууд л дан ганц тэрхүү уур амьсгалыг бий болгогч нь гэж үү?
Гэхдээ байдал тийм ч муу болчихоогүй. Бид хэтэрхий бодит ертөнцөд амьдардаг уйтгартай хүмүүс биш ээ. Хойд туульд пингвин(not Santa!) л байдгийг мэдсэнээр бүх үлгэр замхардаг гэвэл эндүүрэл. Учир нь өөр нэг үлгэрт бид бас итгэдэг хэвээр...
Охид болор шаахай, даашинзныхаа эрэлд гарна. Залуус үл таних нууцлаг тэр бүсгүйгээ хүлээнэ. Тэгээд тэр мөрөөдөл нь 12 цагт замхарчихгүй байхыг хүснэ... Танил сонсогдохгүй байна гэж үү...
Одоо үлгэрт итгэж байна уу?
No comments:
Post a Comment